就算「佢天生有運」都唔代表你無運

就算「佢天生有運」都唔代表你無運

「佢真係好好彩喎！」朋友望住隔籬位升職加薪嘅同事，發出由衷又無奈嘅讚嘆。我點頭附和，但心裡默默補多句：「你以為佢啱啱撞到好機會，其實佢喺撞你之前，已經撞咗幾百次門。」

喺日常生活中，我哋成日聽到人話「佢好彩」、「我唔夠運」、「睇吓邊個撞正咁啱啦」。彷彿運氣係天上掉落嚟嘅獎品，或者某啲人天生就擁有嘅隱形紅利。但如果你細心留意，就會發現，好運的人，往往唔止一次咁啱。

「運氣」真係隨機的咩？

自認「好運」或者「唔好彩」嘅人，佢哋之間最大嘅分別，其實唔係經歷，而係心態與行為模式。簡單啲講，好運並唔係天意，而係一種態度+習慣+社交網絡+認知模式嘅複合體。

舉個例：一個唔怕尷尬、經常主動搭訕嘅人，自然識到多啲人；而每一個人都可能成為佢下一個機會嘅引路人。但一個經常擔心出醜、唔敢開口嘅人，即使身邊坐住 CEO，可能都係默默滑手機收場。所以，有人話「佢好好彩識到個高層」，其實真相係：「佢夠厚面皮坐過去傾偈，先識到個高層。」

「幸運的人」有四大共通點：

乍聽之下，好似雞湯；但你睇睇以下幾個生活場景，就會發現，這些行為背後其實係一種「選擇」。

兩個同樣冇經驗嘅人，見到一個徵人機會。一個話：「我都冇相關背景，唔會請我啦。」

一個話：「反正都冇成本，試下先啦。」結果，第二個人寫咗封熱誠嘅信，獲得面試機會，雖然最終冇上位，但 HR 將佢記咗底，三個月後另一部門請人就搵返佢。

你話佢「好彩」？係。但「試下先啦」就係佢好彩嘅第一步。

一個內向嘅人下班後只想返屋企，但佢硬係逼自己出席一個講座。入到去，一半人面無表情，另一半傾到好似認識咗幾十年。佢差啲想走，但突然聽到旁邊有人提起自己研究興趣，於是鼓起勇氣加入對話。兩個月後，對方介紹佢去另一個研究團隊，最終開展咗人生中一個重要轉向。

運氣？係。但係，如果佢當晚冇出去，就咩都冇。

有啲人，一出事就覺得世界針對自己。「又失戀」、「又炒股蝕錢」、「又比人串」。一個個情緒陷阱咁跌入去。但幸運的人，唔係唔中招，而係中咗招之後點樣應對。佢哋會問：「我學到啲咩？」、「下次點樣可以避過？」、「如果我唔係咁做，會唔會更差？」

運氣，不在於你中唔中招，而在於你中咗之後，係咪仲想學嘢。

「佢天生有運」這句說話，表面係唔抵得人，實質往往係一種深層次嘅推卸。背後可能係推卸自己唔做改變、唔想面對內在懶惰、恐懼或僥倖。

有啲人總想中六合彩、有啲人信塔羅水晶、有啲人話自己命唔靚。你問佢有冇開 email？有冇試報名？佢話：「哎呀，冇喇…你信都信唔到我幾唔好彩。」

其實，佢唔係唔好彩，佢只係無行動。

點樣「製造運氣」？幾個你每日都做到嘅方法。只要我們養以下幾個簡單習慣，可以有效提升你「撞彩」嘅機率：

所謂「好運」，有時只係一個比你早一秒抬頭望四圍嘅人，或者一個願意喺人地冇反應時都繼續講落去嘅人，又或者一個即使唔肯定成功，都會照樣報名、寫信、出門口嘅人。

你眼中佢「天生有運」，其實係你睇漏咗佢持續搵路嘅過程。

唔好等運到，因為你就係你最好嘅風水師。