創業唔係講義氣 而係講制度

創業唔係講義氣，而係講制度

創業者最唔願聽的那幾句說話

有朋友創業，問我可唔可以俾啲實用意見。我問佢：「你想要我幫手開公司、開銀行戶，定係想我講啲你唔想聽但早晚會發生嘅真相？」

佢笑笑口：「都係你講啦，你嗰啲毒雞湯，我都飲慣咗。」

好，咁我今次就唔講點開bank account，唔講點開IG page，唔講點登記MPF。呢啲Google得。但我想講，創業最難，唔係搵錢、唔係搵客，而係搵個可以一齊扛責任但又唔會鬧情緒嘅partner。

我嘅貢獻永遠比你大

創業第十日，一位partner開始開會遲到。創業第三十日，佢日日晏晝先出現。創業第六十日，佢同你講：「其實我係夜晚型，唔係朝早型。你唔好迫我適應你嘅時區啦。」

然後你會發現，佢啲時間就係時間，你啲時間就唔係時間，啲行程又唔交低。但當你自行決定行動，佢批評就好多：「你決定咗啲嘢，點解唔問我先？」、「啲文案冇我tone，點解咁出街？」、「我都未comment完，你出咗post，冇尊重我。」

咦？你唔出席會議，但要成間公司等你批文、批post、批決定？你問拍檔可唔以約實時間開會啫，佢會講：「創業壓力大嘛，我搞到失眠可能有抑鬱，仔女就快同我反面，老婆就快同我離婚，你仲逼我約實開會時間？」係咪有趣呢？拍檔仔女同老婆為咗家庭嘅付出，會自動變成算成是拍檔對公司的付出。

但係，你又唔好以為自係好人。因為你都會批評話：「我做Admin、Finance、HR、Sales，仲要做埋創作。我度橋冇人幫我，我想請人啦！」你終於明白，原來partner之間最傷感情的唔係做唔到，而係人性永遠會覺得自己嘅付出，先至係付出。

小學生吵架式

另一位partner好努力，每日返十粒鐘，做到成面油都唔夠時間抹。但佢好委屈：「我做咁多，你又唔肯計工時。佢得閒嚟吓，仲同我一樣人工？公平咩？」

你話：「唔好咁計啦，大家係partner嘛，睇output啦！」

佢再激嬲：「咁你就當我cheap啦？我做到死都唔重要？你有冇諗過我都係人？」

初創最大迷思就係：你講感情，我講貢獻；你講制度，我講信任；你講時間，我話睇成果。人人都以為自己係核心，其他人係配角。結果會係點？

有人開始會話自己返咗三年工，應該要有假期；

有人話要請人，但又唔畀你請，話你做Admin都要幫埋Marketing；

有人話想自由創作，但成日淨係創作情緒。

你以為創業係自由，其實係無王管

好多人創業，最大原因就係：「唔想返工，想自由啲。」

於是你哋唔簽合同，冇指紋打卡，遲到早退靠自律。你以為大家都會自覺做嘢，結果係：

A partner日日三點先出現，話自己創作需要靈感

B partner每次開會都話自己有緊要事，不斷撳電話，開會分心到爆

C partner唔見人，但又突然彈出嚟：「點解我都未睇你哋就出街？」

自由唔係唔設限，自由係自我管理。如果你唔願畀制度約束自己，你就唔係自由人，你係野人。而合夥就更麻煩，因為自由會互相干擾。每個人都自由選擇做自己唔想做嘅嘢，咁所有嘢都冇人做。

最應該一早傾掂嘅幾條硬規矩

所以，我勸大家，未創業前，一定要傾掂以下幾樣（係，呢啲先係真・創業前婚前協議）：

拆夥點計？蝕錢點算？帶走客戶得唔得？可以開同類業務？

肖像、產出、內容屬誰？在職期間所有創作歸公司。要走，乜都唔好帶走。

人工同分紅計法？現金流為正先有錢分，每次留返20%係公司。唔係你有收入就係賺錢。

數還數，路還路

大家有冇權用公司錢？買文具得唔得？招待費點計？要唔要三方批核？要唔要約實時間開會？通通都要寫落合約。聽落好似好硬？咁唔好創業，因為你其實係想玩合作社或者搞興趣班。

創業要制度，唔係信任。香港人創業最大誤會係：「我地有熱情，就唔會散。」唔好玩啦。我見過唔知幾多初創團隊，「兄弟情」開始，「法庭信」收尾。

嗰啲分手理由你一定聽過：「我以為你會明㗎嘛？」「你做得多，唔代表你有權責怪我？」「你都唔係大股東，點解你咁串？」「我啲努力你唔會見到嘅，但係有做㗎？」好兄弟唔代表可以一齊創業。可以一齊飲酒唔等於可以一齊開公司。冇制度嘅創業，就好似冇安全套嘅戀愛。開頭好正好爽，之後又痕又痛。

想唔傷感情，就寫低一切

我知，好多創業者會覺得：「咁樣好生硬，好似唔信人咁。」

但正正係因為你信對方，所以先要寫低制度。唔係因為你唔信佢今日，而係你唔知佢三個月後、半年後、蝕錢之後、拍拖之後、個仔讀小學之後、轉工之後會變成點。

信感情，唔等於唔要規矩。最深厚的友情，往往係靠清楚的條款守住。如果想拍住上陣，就最好寫低你哋之間每條細節，幫未來嘅你，守住今日嘅初心。想創業？先寫合約。唔好等到散水嗰日先嚟講情。因為情會變，制度先係永恆。千祈唔好口數口賠。

最後，如果你創業三年都未散，恭喜你，你已經唔算係等閒之輩。